نجوم ومشاهير

الوزير السابق الياس بو صعب ضيف دق الجرس .. كنت نازحا لبنانيا في سوريا وجوليا بطرس اشهر مني

حلّ الوزير السابق الياس بو صعب ضيف الحلقة التاسعة من برنامج “دق الجرس” عبر الـMTV في حوار حضرت فيه زوجته جوليا بطرس في معظم أسئلة التلاميذ الذين حقّقوا معه في حياته الخاصة، كما في خياراته وإنتماءاته الحزبية، وآرائه في مختلف قضايا الساعة السياسية.
وخصّ بو صعب الأطفال بهدية قيّمة، وهي عبارة عن كتاب بعنوان “بيت ستي” موقّع من فخامة الرئيس ميشال عون لكلّ واحد منهم.

ومن أبرز ما جاء في الحلقة على لسان الوزير السابق الياس بو صعب التالي:
“فيه مرّة قعدت بكرسي الإعتراف، وسمعت خطايا رفقاتي، ولما لقطني أبونا نجيب أمسكني من ديْنتي، وقال لي: روح ع البيت، وما ترجَعْ من دون أهلك”.
“قدّمت لشي 8 سنين طلب لأعمل جامعة بلبنان وما كانوا يعطوني رخصة. ولما صرت وزير تربية، قررت ما أعمل رخصة لحالي، حتى ما كون عم بستغلّ المنصب إللي أنا موجود فيه”.
“جوليا مشهورة أكتر مني.. والعالم بيضلّوا بيتذكروها، بس السياسيين بيجوا وبيفلّوا والعالم بينسوهن”.
“كتير كنت بحبّ لو إجتني بنت، وكنا رح نسمّيها لين، بس هلّق أنا وأولادي طارق وسامر منقول إنو جوليا هي البنت المدللة بالبيت عنا”!
“كان عندي حلم إنو غنّي من وقت ما كنت بالمدرسة، بس ولا مرة قدرت صيب النغمة لحد ما يئسوا مني. ومعلّمة جوليا إللي بتدرّبا ع الغنا 3 مرات بالأسبوع جرّبت معي، وقالت إنو أنا ميؤوس مني، ومش لازم حاول غنّي أبداً”!
“القواسم المشتركة بين التيار الوطني الحر والحزب السوري القومي الإجتماعي هي إنو اتنياتن ضد الطائفية، ومع العلمانية ومع قيام الدولة المدنية”.
“ما بطمح كون رئيس التيار الوطني الحر. وإذا انعرض علييّ هالمنصب ما بقبله، ما بحسّ حالي بقدر قدّم أداء ناجح كرئيس حزب”.
“وقتا كنت وزير تربية ما كنت إقبض معاشي، لكن جمعت المبلغ ورح حطّوا بتصرّف جمعية عم أسسها مع الوزير زياد بارود وإسمها اتحاد طلبة لبنان”.
“بدي أوصل ليوم إلغي فيه امتحانات البروفيه، لأنه ما فيه بلد بالعالم بعدا امتحانات البروفيه شرط فيه إلا لبنان، وما في بلد بالعالم بيعملوا التلاميذ امتحانات بـ 13 أو 14 مادة إلا بلبنان”!
“سركيس سركيس مش مرشّح التيّار، بس هو نازل معنا. ويمكن هو عم يستفيد من وجوده باللايحة معنا، متل ما نحنا عم نستفيد من كل شخص ممكن يجيب حاصل أكبر لـ اللايحة”!
“إذا نجحت بالإنتخابات ممكن يرشحوني كون نائب رئيس مجلس النواب وممكن لأ، وعلاقتي شخصياً بالرئيس نبيه برّي كتير منيحة”.
“جوليا بتغنّي للمقاومة وللقضية، وما بتغنّي لفريق سياسي ضد أي فريق سياسي تاني”!
“إذا الأفرقاء الشيعة الأساس بالبلد اختاروا الرئيس برّي ، فنحنا ما فينا نختارغير الرئيس برّي لرئاسة المجلس النيابي”.
“أنا ما طلبت ينطرد جان عزيز من أي محل. هو افترى علييّ، وإللي صار معه كان قرار من رئيس الجمهورية ومن إدارة الـOTV، وكنت بنبسِط أكتر لو ما عمل جان عزيز هالغلطة، مع إنو بعدني بيني وبين حالي، عم جرّب إفهم ليه عمل هيك”.
“بلعبة سلّم المرشّحين الروم في المتن، هيك بشوف النتيحة: الياس بو صعب بالأول، بعدين ميشال المرّ، غسان مخيبر، جيسيكا عازار، مازن السكاف، فيوليت غزال، لينا مخيبر وجورج الرحباني”.
“أنا كنت بمرحلة من المراحل متل النازحين السوريين بلبنان، وكنت نازح لبناني بسوريا، وعشت بدير صيدنايا وراحت علييّ سنة مدرسة”!
“إللي عم بيصير بسوريا هو فيلم سينما وكذبة كبيرة. هيدي تمثيلية حتى يقولوا إنو عملنا ردّ. كذبوا ع شعبن، وقالوا إنو ضربنا لأنه فيه كيماوي، وبعد لهلق ما أكدوا إنه فيه كيماوي، وهيك عملوا بالعراق، دمّروها وطلع بالآخر ما فيها أسلحة دمار شامل.. يعني عملوا كل الحرب على بلاش”!
“بطبعي بحبّ صوِّر، وبتلفوني في شي 50 ألف صورة. ولما كنت وزير، كنت صوّر شي وزير نايم، شي وزير شالح من إجريه، شي وزيرة عم تلعب Solitaire، وبيوم من الإيام إذا هنّي بيسمحوا بحطّن”!
الوزير السابق الياس بو صعب عرض على التلاميذ صورة للوزيرة أليس شبطيني  تلعب Solitaire، وصور للوزيريْن رمزي جريج وميشال فرعون نائميْن!
“كنت حط ع إنستاغرام صور أكتر مع بنات، بس خففت لأنو ما بدّي جوليا تزعل، هي ما بتغار لأنه عندا ثقة بالنفس كتير عالية، بس بتقلي: ما تزيدا”!
“أنا ما بشرّج تلفوني، كرمال هيك ما بعرف أدّيه بيدفع الواحد ليشرّج تلفونه، بس يمكن شي 10 آلاف ليرة”!
“جوليا قالتلي من البداية: ما بدّي ياك تعتبرني زوجة وزير، انا مرتك بالبيت، أما بالسياسة فما بدي أعرف شي، وما بدي روح معك لمحلّ”!

” دق الجرس” يعرض كل أحد بتمام الساعة 9:35 مساءً عبر الـMTV، وهو من إنتاج جنان ملاط وشركتها IProduction.

مقالات ذات صلة

زر الذهاب إلى الأعلى